Opning med barna i fokus

Me i Tomatfestivalen er så heldige å ha starta eit samarbeid med Trolljeger, den nye generalsponsoren vår. Saman skal me laga ein spennande Tomatjegerløype på kunstgrasbanen ved Finnøy Skule for store og små under årets festival. Som det sømer seg er det barna som skal få lov til å prøva seg først i løypa og samtidig opne festivalen. Klassane blir delt opp i lag på 5-6 elevar og alle barna får kvar sin medalje.

Det blir eit eige opningsshow som er ope for alle kl. 11:40 der me får besøk av Trygve Slagsvold Vedum, vår finansminister, som vil halda ein tale og deretter springa saman med barna i Tomatjegerløypen. Det vil òg dukka opp fleire kjekke overraskingar under opningsshowet. Så her er det berre å invitera og få med seg foreldre, besteforeldre og bedrifter.

For ungdom, vaksne og barn som ikkje går på Finnøy Skule som vil prøva seg i Tomatjegerløypen vil det bli moglegheiter for det under familieløpet (6 års aldersgrense) seinare på dagen og under hovudløpet (13 års aldersgrense) på laurdagen.