- Eg ser verkeleg fram til helga i Finnøy. Det blir eit kjekt program og artig å treffa folk. Dessutan forventar eg ei smaksoppleving der det er stor variasjon mellom dei ulike tomattypane, seier Ole Einar Bjørndalen, som sjølv er storforbrukar av tomat. - Eg får masse førespurnader om å vera med over alt, så spørsmålet frå Finnøy var ikkje det einaste. Men, Halvard (Hanevold) nemnde at Tomatfestivalen var eit flott arrangement. Så måtte eg inn å kikka litt på nettsidene til festivalen. Og etter nokre samtalar med festivalleiinga og dei der heime, fann eg ut at «Ja, eg vil til Finnøy», fortel Ole Einar.

- Me har hatt ein god dialog med Ole Einar heilt sidan han la opp i starten av april. Når det nå er klart at han kjem til oss, er me kort og godt jublande glade. Me snakkar trass alt om den mestvinnande skiskyttaren gjennom tidene, seier festivalsjef Silje Vignes Flesjå.

Ole Einar Bjørndalen har takka ja til eit heftig program. På laurdagen blir det mellom anna opningsshow, matlaging med barn, gartnartreff, sjøaktivitet og ikkje minst matkonkurranse. - Eg lagar den beste, enkle tomatretten i verda, «Pasta de tomato a la Ole». Med ferske finnøytomatar blir den sikkert betre enn nokon gong, meiner Ole Einar, som skal ut i duell mot fylkesordførar i Rogaland, Solveig Ege Tengesdal. Ryfylkekokken Frode Selvaag er med i dommarpanelet.

- Så skal eg springa Griegløpet sundag. Nå håpar eg berre den prolapsen min forsvinn til løpet. Eg vil jo gjera det litt bra også. For nett nå er eg i elendig form, hevdar skiskyttarpensjonisten som gøymer det beste til slutt.

For sundag ettermiddag, etter løpet og med festhelga på hell, inviterer Tomatfestivalen, Finnøy Idrettslag og Øyposten til «Bli kjent med Ole Einar». Då får tilhøyrarane høyra om oppveksten på garden, satsinga på skiskyting, OL-glimt, kraftige vindkast i Russland, opp- og nedturar, og kort og godt mennesket Ole Einar Bjørndalen.

Meir detaljar om kva Ole Einar Bjørndalen skal gjera og heile Tomatfestivalprogrammet, kjem i slutten av juni.